Борбордук Азиядагы Америка университетинин президенти Тимоти О'Коннордун Кыргыз Республикасынын Билим берүү кызматкерлеринин күнү менен куттуктоосу
3 октября 2026
#Тимоти О’Коннор#Президент#Билим берүү кызматкерлеринин күнү
Урматтуу кесиптештер!
Сиздерди кесиптик майрамыңыздар – Билим берүү кызматкерлеринин күнү менен чын жүрөктөн куттуктайм!
Билим берүү коомдун турмушунда өзгөчө орунду ээлейт. Өлкөнүн келечеги жөнүндөгү кыялдарыбыз, жаңы муундарга болгон үмүтүбүз жана ар бир инсандын өнүгүүсүнө болгон мүмкүнчүлүктөр дал ушул билим берүү менен байланышкан. Мунун баарынын артында терең билимди, чоң ички берилгендикти жана жаңы гана жолун баштап жаткандарга өзгөчө көңүл бурууну талап кылган сиздердин күнүмдүк талыкпаган эмгегиңиздер турат.
Биз өзүбүздүн дараметибизди ачууга жана өз күчүбүзгө ишенүүгө себепчи болгон мугалимдерибизди эч качан унутпайбыз жана ыраазычылык менен эстейбиз. Кээде өз убагында айтылган жылуу сөз же устаттын колдоосу кесип тандоону, аны менен бирге келечек тагдырды аныктап коёт. Сиздердин эмгегиңиздердин өзгөчө миссиясы мына дал ушунда.
Кыргыз Республикасынын өнүгүүсү көп жагынан анын жаш жарандары кандай мүмкүнчүлүктөргө ээ болору менен байланыштуу десек жаңылышпайбыз. Сиздердин аракетиңиздер менен алардын кесиптик жактан калыптанышына пайдубал түптөлүп, коомдук турмушка жоопкерчилик менен катышууга даярдыгы калыптанат. Маданий мурастарды сактап, өз өлкөсүнө болгон урмат-сыйды өткөрүп берүү менен, сиздер жаңы муундарга заманбап дүйнөдөн өз ордун табууга жардам бересиздер. Мындай эмгектин мааниси университеттик аудиториялардан алда канча ашып түшөт.
Бул майрам күнү өзүн билим берүү тармагына арнаган ар бир инсанга ыраазычылык билдиргим келет. Бул тармактын жетишкендиктери жалпы эмгектен – окутуудан жана усулдук иштерден, ойлонулган башкаруучулук чечимдерден, билим алууга шарт түзүүдөгү күнүмдүк камкордуктан куралат. Сиздерге чың ден соолук, бакубатчылык, жакындарыңыздардын жана кесиптик коомчулуктун колдоосун каалайм. Идеяларыңыздар ишке ашып, студенттердин ийгиликтери кубаныч жана сыймык алып келсин. Адамдарга болгон көңүл бурууңуздар бааланып, ал эми жумушуңуздар сиздер аны бир кезде тандаган терең маанисин жоготпосун.
Майрамыңыздар менен, кымбаттуу кесиптештер!
